Biblia Sacra Vulgata

Isaias 15

1 onus Moab quia nocte vastata est Ar Moab conticuit quia nocte vastatus est murus Moab conticuit

2 ascendit domus et Dibon ad excelsa in planctum super Nabo et super Medaba Moab ululabit in cunctis capitibus eius calvitium omnis barba radetur

3 in triviis eius accincti sunt sacco super tecta eius et in plateis eius omnis ululat descendit in fletum

4 clamavit Esebon et Eleale usque Iasa audita est vox eorum super hoc expediti Moab ululabunt anima eius ululabit sibi

5 cor meum ad Moab clamabit vectes eius usque ad Segor vitulam conternantem per ascensum enim Luith flens ascendet et in via Oronaim clamorem contritionis levabunt

6 aquae enim Nemrim desertae erunt quia aruit herba defecit germen viror omnis interiit

7 secundum magnitudinem operis et visitatio eorum ad torrentem salicum ducent eos

8 quoniam circumiit clamor terminum Moab usque ad Gallim ululatus eius et usque ad puteum Helim clamor eius

9 quia aquae Dibon repletae sunt sanguine ponam enim super Dibon additamenta his qui fugerint de Moab leonem et reliquiis terrae

Book Summary

Isaias iudicium et spem Iudae annuntiat: sanctitatem Dei, stultitiam fiduciae in gentibus, et promissionem Regis venturi ac Servi patientis. Prophetiae eius de Emmanuele et de morte expiatoria Servi Novo Testamento fundamentales sunt.

< Isaias 14 Isaias 16 >

Read on Easy Bible Play on Verse Drop