Biblia Sacra Vulgata

Leviticus 12

1 locutus est Dominus ad Mosen dicens

2 loquere filiis Israhel et dices ad eos mulier si suscepto semine pepererit masculum inmunda erit septem diebus iuxta dies separationis menstruae

3 et die octavo circumcidetur infantulus

4 ipsa vero triginta tribus diebus manebit in sanguine purificationis suae omne sanctum non tanget nec ingredietur sanctuarium donec impleantur dies purificationis eius

5 sin autem feminam pepererit inmunda erit duabus ebdomadibus iuxta ritum fluxus menstrui et sexaginta ac sex diebus manebit in sanguine purificationis suae

6 cumque expleti fuerint dies purificationis eius pro filio sive pro filia deferet agnum anniculum in holocaustum et pullum columbae sive turturem pro peccato ad ostium tabernaculi testimonii et tradet sacerdoti

7 qui offeret illa coram Domino et rogabit pro ea et sic mundabitur a profluvio sanguinis sui ista est lex parientis masculum ac feminam

8 quod si non invenerit manus eius nec potuerit offerre agnum sumet duos turtures vel duos pullos columbae unum in holocaustum et alterum pro peccato orabitque pro ea sacerdos et sic mundabitur

Book Summary

Leviticus leges cultus, sacrificii et sanctitatis exponit, quae Israeli in Sinai datae sunt. Sacerdotio et vocatione ad sanctitatem, sicut Deus sanctus est, in medio positis, explicat oblationes, leges puritatis, diem expiationis et sollemnitates annuas.

< Leviticus 11 Leviticus 13 >

Read on Easy Bible Play on Verse Drop